نفسى اكون بركان غضب

كتير كنت بقرأ فى المنتديات


عن علامات تكشف بيها الكدابين


ودى غالبا بتكون من خبرات مسبوقه ودراسات علم نفس


لكن الجديد بقى


انى اكتشفت انى كداااااااب كبييييييييير


عارفين ازاى


هقولكو


اولا الصفه الاولى:
زيــــــــــــــغ البصــــــــر (يعنى مبيبصش ليك مباشره اثناء الكلام )

وانا فعلا مش بحب ابص للى بكلمه

بس مش علشان خايف يكون بيفهم فى لغه العيون

لأ

لكن علشان انا بحب اراقب المكان اللى حواليا كويس

مش براقبه خوف من حاجه

لكن علشان احفظه كويس
وكمان انا اصلا بتحرج اوى لما حد يبصلى ويطول


ثانيا:
استخدام كلمات قليله(وبيقولو فى النقطه دى انه بيستخدم اقل عدد من

الكلمات علشان يقدر يفكر فى الكذبه اللى بيقولها كويس ومش بس كده ده كمان

لو أتكلمت كتير هتبقى بردو كداب علشان هتبقى بتعمل كده علشان تثبت انك

صاادق هههههههههه يعنى كده او كده بردو كداب )

انا بقى طبعى اصلا انى مش بتكلم كتير

لكن لو حد بيحاورنى

بتكلم معاه عادى

بس بيكون كلام قليل

وحتى فى قاعده بتقول خير الكلام ما قل ودل


اللى واضح ان اللى كاتب المواصفات دى مش معترف بالقاعده دى خالص

ثالثا:
بقى دى اللى هى التكلف العصبى

هتقولى يعنى ايه تكلف عصبى

هقولك يعنى مثلا تضرب نفسك بالجزمه القديمه علشان تبقى مكشر وشكلك يقول ان

جد فى كلامك لكن بقى لو حبيت تمسح نظارتك وانت بتتكلم ولا حاجه
هتبقى كدااااااب


اه هتبقى كداب

الطب النفسى بيقول كده

انت هتعرف انكتر منه؟؟؟؟

ووكمان لو قومت بأى حركه لا اراديه بردو هتبقى كداب

يعنى انت لازم تكون عامل زى العمده الالى وراسم على وشك ابتسامه دبلوماسيه

(او متعرفش يعنى دبلوماسيه يبقى اقولك ابتسامه صفرا )اوعى تكون متعرفهاش هى كمان

رابعا :
التكرررررراااااااااار
دى انا ممكن اوافق علم النفس فيها

لكن بردو مش لدرجه تصنيفها من صفات الكدابين

يعنى لو واحد سئلنى سؤال سؤال بأكتر من طريقه

لكن انا معرفش غير اجابه واحده (فى اسئله كتير ممكن تسئلها بأكتر من طريقه لكن بيكون ليها اجابه واحده بس)
ارد عليه اقوله ايه

اكدب عليه علشان مبقاش كداب هههههههههههه

خامسا :
التعميييييييم (ودى مش فيا الحمد لله (بس انا بكتب اللى مواصفات اللى قرأتها )
ودى انا بعتبرها صفه للتخلص من الزنب
مش الكذب


سادسا: تجنب الاشاره للزات

وأعتقد ان فى ناس كتير بتتجنب الاشاره للزات
وألا بقى
هيكون مغرور
فأنا دلوقتى اختار بقى
اكون مغرور
ولا كداااااااب
سابعا
بقى ودى انا موافقو فيها جدا (والحمد لله مش فيا):

يميل الكذاب إلى أن ينسب للآخرين تصرفات و أقوال رديئة خصوصاً رذيلة الكذب

التي هو مصــاب بها ودى فعلا واكيد ولازم تكون متوفره فى الكداب

ثامنا النسيااااااااان:

يعنى لو انت عندك زهايمر تبقى كداب
ولو بتحاول تنسى علشان تعرف تعيش بردو هتبقى كداب


وفى النهايه
معظم الصفات اللى معترض عليها ممكن فعلا تكون من صفات الكدابين
لكن متبقاش صفات معتمده
علشان فى ناس كتير من طباعهم الصفات دى
ومش هلون البوست بقى علشان انا تعبان وعايز ارتاح

ايه اللى هببته ده يا اخى
الف مره اقولك متتسرعش متتسرعش
والله انا مكنتش اقصد اى حاجه من اللى فى دماغهم دى خالص
يا اخى بلا تقصد بلا متقصدش .
عاجبك وضعك اللى انت فيه دلوقتى ؟
خلاص بقى متكبرش الموضوع
واهى اتحلت تقريبا الحمد لله
انت شايف انها كده اتحلت ؟؟؟؟
دى اتنيلت اكتر على دماغك اهو
جتك نيله
لما انت مش قد حاجه بتعملها ليه

بالله عليك يا اخى هتعرف تكلم ...... علشان يشوفلك حل
ان شاء الله هتتحل
بس روق انت بس
مش عارف ليه حاسس ان النهايه مش هتبقى لصالحك خااااااالص
وبكره نقعد جنب الحيطه
ونسمع الزيطه

بصو بقى
انا عملت اللى عليا وخلاص
مع انى حاسس انى غلط
بس ميضرش
ان شاء الله اللى خايف منه مش هيحصل
المهم انى عملت اللى طلبته شيمو
ولاغيت خاصيه رقابه التعليق
وانا من هنا
ارسل نداااااء الى كل مدون
حاطط الكلمه التأكيديه
وحياه ابوك شيلها

انتى مش ملاحظه ان العيد قرب

يعنى المفروض تكون الهديه حتة لحمه (مش هقولك خروف اهو)

مش تاج

بسم الله الرحمن الرحيم
السلام عليكم ورحمه الله وبركاته
اول ما عملت المدونه
فكرت فى البدايه اكتب (انا مين )علشان اعرفكم بيا اكتر
بس انا بصراحه مش بعرف اتكلم عن نفسى
بس انا قررت احاول(جامده قررت دى صح)
ندخل فى المهم
الاسم:امير عبد الناصر
السن :21سنه و11 شهر و20 يومكده بقو 21(والله الساعه لسه متغيره حالا)
المؤهل الدراسى:جامعى وجارى تحضير دراسات عليا
الهوايات :القرأه خاصه كتب الخيال العلمى (وقصص الاطفال)
والكتابه
والرياضه بصفه عامه خاصه الجرى والتايكوندووالكونغ فو والكراتيه او الرياضاات القتاليه عموما

سمات شخصيه :هاااااااادى جدا (شوفتو واحد هادى بيحب الرياضه القتاليه) وبكره العنف جدا جدا
ومش بعرف ازعق او اعلى صوتى على حد (ودى عملاالى مشكله على فكره)
معظم الوقت بكون ساكت (وده بيدايق ناس كتير منى )
مش بعرف اجامل خاااالص
ودى بردو عاملالى مشكله
لأنى بحس انى تعديت حدود الصراحه وبقت وقاحه
اسلوبى فى الكلام فى بعض الاحيان بيكون مستفز جدا للى قدامى
بس ده بيتوقف على عده عوامل
وعندى شويه حاجات غريبه فى شخصيتى مش لازم تعرفوهها
ومش عارف بقى هقول ايه تانى
بس تعرفو
انا كنت مستنى دورى فى كرسى الاعتراف
علشان تسئلونى
علشان حاسس انكو متعرفوش عنى حاجه
وانا مش بعرف احكى عن نفسى
فلو عايزين تسئلونى هنا
انا مستعد

السلام عليكم
من البدايه يعنى مش عايز تريقه

محدش يقولى بقى بالزمه فى زهره على شكل قلب
اه ياعم فى
عايزه تشوفها ؟
طيب غمض عنيك
غمضت؟؟؟
تخيل بقى شكلها
ايه




بتقول مبتعرفش تتخيل !!!



يا دى النيله
طيب ركز مع عمو بطوط
وهو هيوريهالك

ده كليب كده على قدى عملته لاستاذى سعيد عزت